WhatsApp Username | ହ୍ୱାଟସଆପ୍ର ୟୁଜରନେମ୍ ଫିଚରକୁ ନେଇ ସରକାରଙ୍କ ନୋଟିସ୍; ଜୁଲାଇ ୯ ସୁଦ୍ଧା ମେଟାକୁ ଜବାବ ଦେବାକୁ ନିର୍ଦ୍ଦେଶ
ନୂଆଦିଲ୍ଲୀ: ବିଶ୍ୱର ସର୍ବାଧିକ ବ୍ୟବହୃତ ଇନଷ୍ଟାଣ୍ଟ ମେସେଜିଂ ପ୍ଲାଟଫର୍ମ ହ୍ୱାଟସଆପ୍ ଏହାର ନୂଆ ୟୁଜରନେମ୍ ଫିଚର ଆରମ୍ଭ କରିବାକୁ ପ୍ରସ୍ତୁତି ଚଳାଇଥିବାବେଳେ, ଭାରତ ସରକାର ଏହାକୁ ନେଇ ଗୁରୁତର ପ୍ରଶ୍ନ ଉଠାଇଛନ୍ତି। ଏହି ଫିଚରକୁ ନେଇ ସ୍ପଷ୍ଟୀକରଣ ଦେବା ପାଇଁ ସରକାର ମେଟାକୁ ଜୁଲାଇ ୯ ପର୍ଯ୍ୟନ୍ତ ସମୟ ଦେଇଛନ୍ତି।
ହ୍ୱାଟସଆପ୍ର ୟୁଜରନେମ୍ ଫିଚରକୁ ନେଇ ଭାରତ ସରକାର ଓ ମେଟା ମଧ୍ୟରେ ଚାଲିଥିବା ଆଲୋଚନା ଏପର୍ଯ୍ୟନ୍ତ ଜାରି ରହିଛି। ପ୍ରଥମେ କମ୍ପାନୀକୁ ତିନି ଦିନ ମଧ୍ୟରେ ଜବାବ ଦେବାକୁ କୁହାଯାଇଥିଲା। ତେବେ ବର୍ତ୍ତମାନ ସେହି ସମୟସୀମାକୁ ବଢ଼ାଇ ଜୁଲାଇ ୯ ପର୍ଯ୍ୟନ୍ତ କରାଯାଇଛି।
ସରକାରଙ୍କ ଚିନ୍ତା କ’ଣ?
ହ୍ୱାଟସଆପ୍ର ଏହି ନୂତନ ଫିଚର ମାଧ୍ୟମରେ ବ୍ୟବହାରକାରୀମାନେ ନିଜ ମୋବାଇଲ୍ ନମ୍ବର ପ୍ରକାଶ ନକରି କେବଳ ୟୁଜରନେମ୍ ଦ୍ୱାରା ଅନ୍ୟମାନଙ୍କ ସହ ଯୋଗାଯୋଗ କରିପାରିବେ। ମେଟାର କହିବା ଅନୁଯାୟୀ, ଏହା ବ୍ୟବହାରକାରୀଙ୍କ ଗୋପନୀୟତାକୁ ଆହୁରି ସୁଦୃଢ଼ କରିବ।
କିନ୍ତୁ ଭାରତ ସରକାରଙ୍କ ମତରେ, ଏହି ସୁବିଧା ଅନଲାଇନ୍ ଠକେଇ, ଫିସିଂ, ନକଲି ପରିଚୟ ସୃଷ୍ଟି ଓ ସାଇବର ଅପରାଧ ବୃଦ୍ଧିର କାରଣ ହୋଇପାରେ। ସେଥିପାଇଁ ଫିଚରଟି ଲଞ୍ଚ ପୂର୍ବରୁ ଏହାର ସୁରକ୍ଷା ବ୍ୟବସ୍ଥାକୁ ସରକାର ଖତିଆନ କରୁଛନ୍ତି।
ମେଟାକୁ ଜାରି ହୋଇଛି ନୋଟିସ୍
ଗତ ସପ୍ତାହରେ ସରକାର ମେଟାକୁ ଏକ ନୋଟିସ୍ ଜାରି କରି ୟୁଜରନେମ୍ ଫିଚରର ରୋଲଆଉଟ୍ ଅସ୍ଥାୟୀ ଭାବେ ବନ୍ଦ ରଖିବା ସହ ଏହାର ସମ୍ପୂର୍ଣ୍ଣ ବିବରଣୀ ଦେବାକୁ କହିଥିଲେ। ଏହାକୁ ନେଇ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ (MeitY) ଓ ମେଟାର ଅଧିକାରୀମାନଙ୍କ ମଧ୍ୟରେ ଏକ ବୈଠକ ମଧ୍ୟ ହୋଇସାରିଛି।
ବୈଠକରେ ମେଟା ପକ୍ଷରୁ ଫିଚର ସମ୍ପର୍କିତ ସୁରକ୍ଷା ବ୍ୟବସ୍ଥା ଉପସ୍ଥାପନ କରାଯାଇଥିଲା। ଏହାପରେ କମ୍ପାନୀକୁ ବିସ୍ତୃତ ଲିଖିତ ଜବାବ ଦାଖଲ କରିବା ପାଇଁ ଜୁଲାଇ ୯ ପର୍ଯ୍ୟନ୍ତ ସମୟ ଦିଆଯାଇଛି।
ମେଟାର ସଫେଇ
ମେଟା କହିଛି ଯେ, ୟୁଜରନେମ୍ ଫିଚର ଆରମ୍ଭରୁ ହିଁ ସୁରକ୍ଷାକୁ ପ୍ରାଥମିକତା ଦେଇ ବିକଶିତ କରାଯାଇଛି। କମ୍ପାନୀ ଅନୁଯାୟୀ, ୟୁଜରନେମ୍ ବ୍ୟବହାର ସମ୍ପୂର୍ଣ୍ଣ ଇଚ୍ଛାଧୀନ ହେବ ଏବଂ ହ୍ୱାଟସଆପ୍ ଆକାଉଣ୍ଟ ସୃଷ୍ଟି ପାଇଁ ମୋବାଇଲ୍ ନମ୍ବର ଅନିବାର୍ଯ୍ୟ ରହିବ।
ଏହାସହ କାହା ସହ ଯୋଗାଯୋଗ କରିବା ପାଇଁ ତାଙ୍କର ସଠିକ୍ ୟୁଜରନେମ୍ ଜାଣିବା ଆବଶ୍ୟକ ହେବ। ନକଲି ଆକାଉଣ୍ଟ ଓ ସାଇବର ଠକେଇକୁ ରୋକିବା ପାଇଁ ଏକାଧିକ ସୁରକ୍ଷା ସ୍ତର ଯୋଡ଼ାଯାଇଥିବା ଦାବି କରିଛି ମେଟା। ଏହି ଫିଚରକୁ ନେଇ କମ୍ପାନୀ ଏକ FAQ ମଧ୍ୟ ପ୍ରକାଶ କରିଛି।
କାହିଁକି ସତର୍କ ସରକାର?
ମେଟାର ସଫେଇ ସତ୍ତ୍ୱେ ସରକାର ଏପର୍ଯ୍ୟନ୍ତ ସନ୍ତୁଷ୍ଟ ନୁହେଁ। ଅଧିକାରୀମାନଙ୍କ କହିବା ଅନୁଯାୟୀ, ଟେଲିଗ୍ରାମ ପରି ପ୍ଲାଟଫର୍ମରେ ୟୁଜରନେମ୍ ଓ ଅନାମିକତାକୁ ବ୍ୟବହାର କରି ଅନେକ ସାଇବର ଅପରାଧ ସଂଘଟିତ ହୋଇଛି। ସେହି ଅନୁଭବକୁ ଦୃଷ୍ଟିରେ ରଖି ହ୍ୱାଟସଆପ୍ର ନୂତନ ଫିଚରକୁ ନେଇ ମଧ୍ୟ ସରକାର ସତର୍କ ରହିଛନ୍ତି।
ସରକାର ନିଶ୍ଚିତ ହେବାକୁ ଚାହୁଁଛନ୍ତି ଯେ, ଏହି ଫିଚର ଚାଲୁ ହେବା ପରେ ଏହା ନକଲି ପରିଚୟ ସୃଷ୍ଟି କରି ସାଧାରଣ ଲୋକଙ୍କୁ ଠକିବାର ମାଧ୍ୟମ ପାଲଟିବ ନାହିଁ।
ଜୁଲାଇ ୯ ଉପରେ ସମସ୍ତଙ୍କ ନଜର
ଭାରତ ହେଉଛି ହ୍ୱାଟସଆପ୍ର ସବୁଠାରୁ ବଡ଼ ବଜାର, ଯେଉଁଠାରେ ୮୦ କୋଟିରୁ ଅଧିକ ବ୍ୟବହାରକାରୀ ଅଛନ୍ତି। ତେଣୁ ଭାରତ ସରକାରଙ୍କ ନିଷ୍ପତ୍ତି କେବଳ ଦେଶରେ ନୁହେଁ, ବରଂ ହ୍ୱାଟସଆପ୍ର ବିଶ୍ୱବ୍ୟାପୀ ୟୁଜରନେମ୍ ଫିଚର ରୋଲଆଉଟ୍ ଉପରେ ମଧ୍ୟ ପ୍ରଭାବ ପକାଇପାରେ।
ଏବେ ସମସ୍ତଙ୍କ ନଜର ଜୁଲାଇ ୯ ତାରିଖ ଉପରେ ରହିଛି। ସେହିଦିନ ମେଟା ସରକାରଙ୍କ ନିକଟରେ ଏହାର ବିସ୍ତୃତ ପ୍ରତିକ୍ରିୟା ଦାଖଲ କରିବ। ଏହା ପରେ ଭାରତରେ ହ୍ୱାଟସଆପ୍ର ୟୁଜରନେମ୍ ଫିଚର କେବେ ଓ କେଉଁ ସର୍ତ୍ତରେ ଆରମ୍ଭ ହେବ, ସେନେଇ ଚୂଡ଼ାନ୍ତ ନିଷ୍ପତ୍ତି ନିଆଯିବ।