ନୂଆଦିଲ୍ଲୀ, ୧୦/୦୭: ଭାରତୀୟ କ୍ରିକେଟ୍ର କିମ୍ବଦନ୍ତୀ ବ୍ୟାଟର ସୁନୀଲ ଗାଭାସ୍କର ଆଜି ତାଙ୍କ ୭୭ତମ ଜନ୍ମଦିନ ପାଳନ କରୁଛନ୍ତି। ଏହି ଅବସରରେ ତାଙ୍କ ପ୍ରେମ କାହାଣୀ ପୁଣିଥରେ ଚର୍ଚ୍ଚାରେ ଆସିଛି। ଅଟୋଗ୍ରାଫରୁ ଆରମ୍ଭ ହୋଇଥିବା ଏହି ସମ୍ପର୍କ ପରେ ବିବାହରେ ପରିଣତ ହୋଇଥିଲା।
୨୩ ସେପ୍ଟେମ୍ବର ୧୯୭୪ରେ ସୁନୀଲ ଗାଭାସ୍କର ମାର୍ଶନିଲ ମେହରୋତ୍ରାଙ୍କୁ ବିବାହ କରିଥିଲେ। ଦୁହେଁଙ୍କ ପ୍ରଥମ ସାକ୍ଷାତ ୧୯୭୩ ମସିହାରେ ଦିଲ୍ଲୀରେ ହୋଇଥିଲା। ସେତେବେଳେ ଟିମ୍ ଇଣ୍ଡିଆ ଏକ ମ୍ୟାଚ୍ ଖେଳୁଥିବା ବେଳେ ମାର୍ଶନିଲ ନିଜ ବନ୍ଧୁମାନଙ୍କ ସହ ଷ୍ଟାଡିୟମକୁ ମ୍ୟାଚ୍ ଦେଖିବାକୁ ଯାଇଥିଲେ।
ଅଟୋଗ୍ରାଫରୁ ବନ୍ଧୁତ୍ୱ, ପରେ ପ୍ରେମ
ମଧ୍ୟାହ୍ନ ବିରତି ସମୟରେ ମାର୍ଶନିଲ ଖେଳାଳିମାନଙ୍କଠାରୁ ଅଟୋଗ୍ରାଫ ନେଉଥିବା ବେଳେ ସୁନୀଲ ଗାଭାସ୍କରଙ୍କ ସହ ପ୍ରଥମ ଥର କଥା ହୋଇଥିଲା। ସେହି ପରିଚୟ ଧୀରେ ଧୀରେ ବନ୍ଧୁତ୍ୱରେ ଏବଂ ପରେ ପ୍ରେମ ସମ୍ପର୍କରେ ପରିଣତ ହୋଇଥିଲା।
କିଛି ସମୟ ପରେ ଗାଭାସ୍କର ମାର୍ଶନିଲଙ୍କୁ ପ୍ରେମ ନିବେଦନ କରିଥିଲେ ଏବଂ ସେ ମଧ୍ୟ ସମ୍ମତି ଜଣାଇଥିଲେ। ଏହା ପରେ ଉଭୟଙ୍କ ସମ୍ପର୍କ ଆହୁରି ମଜବୁତ ହୋଇଥିଲା।
କାନପୁର ଯାତ୍ରାକୁ ନେଇ ବଢ଼ିଥିଲା ଚର୍ଚ୍ଚା
ସେତେବେଳେ ଗାଭାସ୍କର ଭାରତୀୟ କ୍ରିକେଟ୍ର ଅଗ୍ରଣୀ ତାରକା ଥିବାରୁ ତାଙ୍କର ବାରମ୍ବାର କାନପୁର ଗସ୍ତ ଚର୍ଚ୍ଚାର ବିଷୟ ହୋଇଥିଲା। ସେଠାରେ ତାଙ୍କ ପ୍ରେମିକା ରହୁଥିବାରୁ ସେ ଭେଟିବାକୁ ଯାଉଥିବେ ବୋଲି ସେତେବେଳେ ଚର୍ଚ୍ଚା ହୋଇଥିଲା।
ପରିବାର ସମ୍ମୁଖରେ ଦେଇଥିଲେ ବିବାହ ପ୍ରସ୍ତାବ
କାନପୁରରେ ଏକ ମ୍ୟାଚ୍ ପରେ ଗାଭାସ୍କର ନିଜ ବନ୍ଧୁ ଅଜୟ ଗୁପ୍ତାଙ୍କ ସହଯୋଗରେ ମାର୍ଶନିଲଙ୍କ ପରିବାରକୁ ମ୍ୟାଚ୍ର ଟିକେଟ୍ ପଠାଇଥିଲେ। ମ୍ୟାଚ୍ ଶେଷ ପରେ ସେ ପରିବାର ସଦସ୍ୟଙ୍କ ସାମ୍ନାରେ ମାର୍ଶନିଲଙ୍କୁ ବିବାହ ପାଇଁ ପ୍ରସ୍ତାବ ଦେଇଥିଲେ। ଉଭୟ ପରିବାରର ସମ୍ମତି ପରେ ୨୩ ସେପ୍ଟେମ୍ବର ୧୯୭୪ରେ ଦୁହେଁ ବିବାହ ବନ୍ଧନରେ ଆବଦ୍ଧ ହୋଇଥିଲେ।
