ନୂଆଦିଲ୍ଲୀ: କେତନ ଅଗ୍ରୱାଲ ହତ୍ୟା ମାମଲାରେ ନ୍ୟାୟ ପାଇଁ ସଂଘର୍ଷ ଏବେ ରାଷ୍ଟ୍ରପତି ଭବନ ପର୍ଯ୍ୟନ୍ତ ପହଞ୍ଚିଛି। କେତନଙ୍କ ବାପା ବିଶାଲ ଅଗ୍ରୱାଲ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଭାବପ୍ରବଣ ଚିଠି ଲେଖି ମାମଲାର ଶୁଣାଣି ଫାଷ୍ଟ-ଟ୍ରାକ୍ କୋର୍ଟରେ କରାଯିବା ସହ ଅଭିଯୁକ୍ତ ସିଆ ଗୋୟଲ ଓ ଚେତନ ଚୌଧୁରୀଙ୍କ ବିରୋଧରେ ଶୀଘ୍ର ଆଇନଗତ ପଦକ୍ଷେପ ନେବାକୁ ଅନୁରୋଧ କରିଛନ୍ତି।
ଚିଠିରେ ବିଶାଲ ଅଗ୍ରୱାଲ ଲେଖିଛନ୍ତି ଯେ, ସେ ଜଣେ ଶିଳ୍ପପତି କିମ୍ବା ପ୍ରଭାବଶାଳୀ ବ୍ୟକ୍ତି ଭାବେ ନୁହେଁ, ବରଂ ନିଜ ସନ୍ତାନକୁ ହରାଇଥିବା ଜଣେ ପିତା ଭାବେ ନ୍ୟାୟ ପାଇଁ ନିବେଦନ କରୁଛନ୍ତି। ସେ କହିଛନ୍ତି, “ମୁଁ କେବଳ ମୋ ପୁଅ ପାଇଁ ନ୍ୟାୟ ଚାହୁଁଥିବା ଜଣେ ପିତା।”
ସେ ଉଲ୍ଲେଖ କରିଛନ୍ତି ଯେ, କେତନଙ୍କ ନିର୍ମମ ହତ୍ୟା ପରେ ସେମାନଙ୍କ ପରିବାରର ଜୀବନ ସମ୍ପୂର୍ଣ୍ଣ ବଦଳିଯାଇଛି। ପ୍ରତ୍ୟେକ ଦିନ ଓ ପ୍ରତ୍ୟେକ ରାତି ସେମାନଙ୍କ ମନରେ ଗୋଟିଏ ପ୍ରଶ୍ନ ଉଠୁଛି—କେତନଙ୍କୁ କେବେ ନ୍ୟାୟ ମିଳିବ?
ଚିଠିରେ ବିଶାଲ ଅଗ୍ରୱାଲ ଆଉ ଏକ ବ୍ୟକ୍ତିଗତ ଦୁଃଖର କଥା ମଧ୍ୟ ଉଲ୍ଲେଖ କରିଛନ୍ତି। ସେ କହିଛନ୍ତି, କେତନଙ୍କ ମୃତ୍ୟୁର ମାତ୍ର ୨୦ ଦିନ ପରେ ତାଙ୍କ ବାପାଙ୍କର ମଧ୍ୟ ପରଲୋକ ଘଟିଥିଲା। ନାତିଙ୍କ ମୃତ୍ୟୁର ଆଘାତ ସେ ସହ୍ୟ କରିପାରି ନଥିଲେ। ଲଗାତାର ମାନସିକ ଚାପ ଓ ଦୁଃଖ ଯୋଗୁଁ ତାଙ୍କ ସ୍ୱାସ୍ଥ୍ୟ ଅବନତି ଘଟିଥିଲା ଏବଂ ଶେଷରେ ସେ ମୃତ୍ୟୁବରଣ କରିଥିଲେ।
ବିଶାଲ ଅଗ୍ରୱାଲ କହିଛନ୍ତି ଯେ, ଅତି କମ୍ ସମୟ ମଧ୍ୟରେ ସେ ନିଜ ପୁଅ ଓ ବାପା—ଉଭୟଙ୍କୁ ହରାଇଛନ୍ତି। ଏହି ଘଟଣା ସମଗ୍ର ପରିବାରକୁ ଗଭୀର ମାନସିକ ଆଘାତ ଦେଇଛି।
ଚିଠିରେ ସେ ସ୍ପଷ୍ଟ କରିଛନ୍ତି ଯେ, ତାଙ୍କ ପରିବାର କୌଣସି ବିଶେଷ ସୁବିଧା କିମ୍ବା ରିହାତି ଦାବି କରୁନାହାନ୍ତି। ସେମାନଙ୍କର ଏକମାତ୍ର ଦାବି ହେଉଛି ମାମଲାର ଶୁଣାଣି ଫାଷ୍ଟ-ଟ୍ରାକ୍ କୋର୍ଟରେ କରାଯାଉ, ଯାହା ଫଳରେ ନ୍ୟାୟ ପ୍ରକ୍ରିୟାରେ ଅଯଥା ବିଳମ୍ବ ନ ହେଉ ଏବଂ ଦୋଷୀମାନଙ୍କୁ ଆଇନ ଅନୁଯାୟୀ ଯଥାଶୀଘ୍ର କଠୋର ଦଣ୍ଡ ମିଳୁ।
ସେ ଆହୁରି ଲେଖିଛନ୍ତି ଯେ, କେତନ ଆଉ କେବେ ଫେରିବେ ନାହିଁ। କିନ୍ତୁ ସମାଜକୁ ଏହି ବାର୍ତ୍ତା ମିଳିବା ଆବଶ୍ୟକ ଯେ, ଜଘନ୍ୟ ଅପରାଧ କରିଥିବା ବ୍ୟକ୍ତିମାନେ ଆଇନ ପ୍ରକ୍ରିୟାର ବିଳମ୍ବର ସୁଯୋଗ ନେଇ ଦଣ୍ଡରୁ ରକ୍ଷା ପାଇପାରିବେ ନାହିଁ। ତାଙ୍କ ମତରେ, ଦୋଷୀଙ୍କୁ ଶୀଘ୍ର ଓ କଠୋର ଦଣ୍ଡ ମିଳିଲେ କେବଳ ତାଙ୍କ ପରିବାର ନୁହେଁ, ସମାଜର ଆଇନ ବ୍ୟବସ୍ଥା ଉପରେ ବିଶ୍ୱାସ ମଧ୍ୟ ଅଧିକ ସୁଦୃଢ଼ ହେବ।
ଚିଠିର ଶେଷରେ ବିଶାଲ ଅଗ୍ରୱାଲ ରାଷ୍ଟ୍ରପତିଙ୍କୁ ନିବେଦନ କରିଛନ୍ତି ଯେ, କେତନ ଅଗ୍ରୱାଲଙ୍କ ମାମଲାକୁ କେବଳ ଏକ ସରକାରୀ ଫାଇଲ ଭାବେ ନ ଦେଖାଯାଉ। ଏହା ପଛରେ ଏକ ପରିବାରର ଅସହ୍ୟ ଯନ୍ତ୍ରଣା ଲୁଚି ରହିଛି, ଯେଉଁ ପରିବାର ଆଜି ମଧ୍ୟ ନ୍ୟାୟ ମିଳିବାର ଅପେକ୍ଷାରେ ରହିଛି।
